ҚАЕУ өңірдегі колледждермен серіктестік байланыстарды нығайтуда

2025 жылғы 7 қарашада «Цифрлық әлемдегі білім беруді ізгілендіру: халықаралық серіктестіктің кәсіби және этикалық бағдарлары» Халықаралық ғылыми конгресінің іс-шаралары шеңберінде Қазақстан-Американдық еркін университетінде Шығыс Қазақстан облысының колледждерімен ынтымақтастық туралы меморандумдарға қол қойылды.

Құжаттар ҚАЕУ мен ШҚО білім басқармасының «Гуманитарлық-техникалық колледж» ЖШС (Шемонаиха қ.), ШҚО білім басқармасының «Шығыс Қазақстан көпсалалы колледжі» КМҚК (Саратовка ауылы, Ұлан ауданы), «Алтай Жоғары колледжі» мекемесі (Алтай қ.) және ШҚО білім беру басқармасының «Риддер көпсалалы колледжі» КММ (Риддер қ.)  арасындағы серіктестікті бекітті.

Меморандумдар академиялық серіктестікті дамытуға, бірлескен білім беру және ғылыми жобаларды іске асыруға, студенттердің іс-тәжірибелері мен тағылымдамаларын ұйымдастыруға, сондай-ақ кәсіптік бағдар беру жұмысын жетілдіруге бағытталған.

Білім беру бағдарламаларының сабақтастығын қамтамасыз ететін және білім алушылардың кәсіби дамуының тұрақты траекториясын жасайтын «Мектеп – колледж – ЖОО» моделін іске асыруға ерекше назар аударылды.

Меморандумдарға қол қою ҚАЕУ-нің білім беру ұйымдары арасындағы желілік өзара іс-қимылды нығайту және цифрлық дәуірде білім берудің гуманистік құндылықтарын ілгерілету жөніндегі стратегиясының қисынды жалғасы болды.