ҚАЕУ өкілдері Дүниежүзілік туризм күнінің іскерлік алаңына қатысты

2026 жылғы 26 қыркүйекте Өскеменде Сол жағалау кешенінің аумағында Шығыс Қазақстан облысындағы Дүниежүзілік туризм күніне арналған іс-шаралар шеңберінде іскерлік алаң өтті. Форум жұмысына Қазақстан-Американдық еркін университетінің басшылығы мен шетелдік серіктестері белсенді қатысып, кадрларды даярлау мен қонақжайлылық индустриясын тұрақты дамытудағы халықаралық ынтымақтастықтың жоғары маңыздылығын атап өтті.

ҚАЕУ өкілдері – халықаралық бағдарламалар және ынтымақтастық жөніндегі вице-президент Дэниел Бэлласт және бірінші вице-президент Жасұлан Ерболұлы Байкенов өңірдің туристік әлеуетін дамытудың негізгі стратегияларын талқылауға қатысты.

Онлайн форматтағы халықаралық өзара іс-қимыл шеңберінде қатысушылар алдында «Тұрақты туризм: Қазақстан үшін халықаралық тәжірибе мен мүмкіндіктер» атты баяндамамен  ҚАЕУ Қамқоршылық кеңесінің мүшесі Хью Холлман сөз сөйледі. Сондай-ақ онлайн-сессияға спикерлер мен қонақтардың өзекті сұрақтарына жауап берген Аризона Университетінің өкілі Ола Лундемо қатысты. Сонымен қатар, алаңға қатысушылар кадр тапшылығын еңсеру, цифрлық экожүйелерді енгізу, әлеуметтік желілерде туризмді ілгерілету және ШҚО-да мемлекеттік-жекешелік серіктестікті дамыту мәселелерін қарастырды.