ҚАЕУ студенттері сыни ойлау және фактчекинг бойынша тренингке қатысты

2026 жылғы 23 шілдеде Қазақстан-Американдық еркін университетінің «Журналистика» білім беру бағдарламасының студенттері Юрий Матвиенко мен Марат Ерасыл сыни ойлау мен фактчекинг дағдыларын дамытуға арналған білім беру тренингіне қатысты. Іс-шара А.С.Пушкин атындағы Шығыс Қазақстан облыстық кітапханасының Американдық бұрышында өтті.

Тренингті «Tauan» қоғамдық қоры ұйымдастырды. Іс-шараның спикерлері Павлодар қаласының сарапшылары Марал Айтмағамбетова мен Евгений Хабаров болды, олар қатысушыларды ақпаратты тексерудің негізгі қағидаттарымен, жалған жаңалықтарды анықтау әдістерімен және медиаконтентті талдау құралдарымен таныстырды. Сондай-ақ кездесу барысында кең таралған ақпараттық манипуляциялар мен оларды тану тәсілдері қаралды.

Қатысушылар алған білімдерін нақты мысалдарда қолдана отырып,  тәжірибелік тапсырмаларды орындады. Тренинг студенттерге ақпаратты сыни талдау дағдыларын нығайтуға және заманауи ақпараттық кеңістік жағдайында фактчекингтің мәнін жақсы түсінуге мүмкіндік берді.