ҚАЕУ-ге 30 жыл: ҚАЕУ президенті АҚШ-тың Бас консулымен кездесті
Қазақстан-Американдық еркін университетінің президенті Ережеп Әлхайырұлы Мәмбетқазиев Алматыда АҚШ-тың Бас консулы Мишель Йеркин ханыммен кездесті. Бұл кездесу ҚАЕУ-нің халықаралық білім беру қоғамдастығының өкілдерімен ұзақ мерзімді байланыстарын растайтын сыпайылық сапары ретінде ұйымдастырылды.
Академик Ережеп Мәмбетқазиев, жоғары білім саласындағы көрнекті қайраткер және Қазақстан-Американдық еркін университетінің негізін қалаушы, Қазақстанмен де, әлемдік академиялық қоғамдастықпен де кең байланыста.
Оның басшылығымен 1994 жылы халықаралық ынтымақтастық пен мәдени даму ахуалында үш тілде сапалы білім беру мақсатында Қазақстан-Американдық еркін университеті құрылды.
Мишель Йеркин ханыммен кездесу барысында Ережеп Әлхайырұлы 30 жыл бойы табысты мәдениетаралық білім алмасу мен халықаралық ынтымақтастықтың үлгісі болып табылатын университеттің тарихы мен жетістіктерімен бөлісті. Өз кезегінде Йеркин ханым білім беру және мәдени алмасу саласындағы университетке деген ризашылығын білдірді.
Бұл кездесу біздің университет пен халықаралық білім беру мекемелері арасындағы байланысты нығайтуға жасалған тағы бір қадам болды. Біз Қазақстанды халықаралық аренада таныстыру мүмкіндігін мақтан тұтамыз және білім беру көкжиегімізді кеңейту бойынша жұмысты жалғастырамыз.
Естеріңізге сала кетейік, биыл халықаралық серіктестіктің алғашқы отандық жоғары оқу орны– Қазақстан-Американдық еркін университеті өзінің 30 жылдығын атап өтуде.